Sérkjör og afslættir fyrir eldra fólk
Ýmis sérkjör og afslættir eru í boði fyrir eldra fólk, svo sem lægri gjöld fyrir heilbrigðisþjónustu, styrki Sjúkratrygginga og afslættir víða, sem vert er að kynna sér.
Greiðsluþátttaka í kostnaði við heilbrigðisþjónustu
Heilbrigðisráðuneytið ákveður árlega greiðsluþátttöku sjúkratryggðra í kostnaði vegna heilbrigðisþjónustu.
Eldra fólk greiðir ekki fyrir komu í heilsugæslu og vitjanir og lægri gjöld fyrir aðra þjónustu heilsugæslu og annarra þjónustuaðila. Lyfjakostnaður eldra fólks er lægri.
Tannlækningar
Sjúkratryggingar taka þátt í greiðslu á tannlækningum fyrir eldra fólk. Forsenda fyrir greiðsluþátttöku eldra fólks er að viðkomandi sé skráð hjá heimilistannlækni.
Styrkir Sjúkratrygginga
Sjúkratryggingar geta veitt styrki, meðal annars til að kaupa og reksturs á bíl vegna hreyfihömlunar og kaupa á gleraugum og heyrnartækjum. Sjúkratryggingar niðurgreiða einnig kaup á hjálpartækjum.
Útfararkostnaður
Sum stéttarfélög veita félagsmönnum styrki vegna útfararkostnaðar. Fái einstaklingur styrk til útfararkostnaðar þá er hægt að telja þann kostnað fram á skattaskýrslunni árið eftir útför til frádráttar á móti styrknum.
Félag eldri borgara
Félagsmenn í félögum eldri borgara eiga kost á sérkjörum gegn framvísun félagsskírteina.
Þá geta félagsmenn á eftirlaunum innan stéttarfélaga átt ýmis réttindi svo sem til styrkja úr símenntunar- og orlofssjóðum eða dvöl í sumarhúsum.
Ýmis útgjöld eldra fólks eru lægri, svo sem greiðsluþátttaka í heilbrigðisþjónustu, aðgangur í sundlaugar og fleira. Hér er tekin nokkur dæmi.
Landsamband eldri borgara gefur árlega út afsláttarbók fyrir félagsmenn, en afslættirnir eru líka aðgengilegir í gegnum afsláttarappið Spara.
Afslættir fyrir eldra fólk eru í boða á ýmsum stöðum óháð félagsaðild.
Sund
Víða er frítt í sund fyrir eldra fólk og annars staðar er gjaldið hóflegt. Sund er góð heilsuefling.
Lýðheilsustyrkir
Nokkur sveitarfélög bjóða upp á styrki til eldra fólks til að stunda íþróttir og menningarstarf, en önnur bjóða upp á heilsurækt á hóflegu verði.
Menningarkort
Nokkur sveitafélög bjóða upp á menningarkort á hóflegu verði. Menning eykur fjölbreytni í lífi okkar og veitir ánægju.