DRG - Framleiðslutengd fjármögnun heilbrigðisstofnana
Hvað er DRG?
DRG er hannað til þess að flokka sjúklinga eftir umfangi aðfanga sem að þjónustan krefst. Kerfið byggir á að áþekk heilbrigðisþjónusta myndi hópa með svipaðar sjúkdómsgreiningar og meðferðarþarfir sem bera viðlíka kostnað. Þessir hópar eru kallaðir DRG-flokkar. Flokkunin er byggð á upplýsingum úr sjúkraskrá, þ.e. sjúkdómsgreiningum, aðgerðum og öðrum viðeigandi gögnum sem tengjast lýðfræðilegum þáttum sjúklinga.
DRG flokkunarkerfið er skilgreint sem annars stigs flokkunarkerfi (secondary classification system) þar sem það byggir á öðrum grunnflokkunarkerfum; flokkunarkerfi sjúkdómsgreininga ICD-10 og flokkunarkerfi aðgerða/meðferða NCSP-IS.
DRG kerfið samanstendur af rúmlega 870 flokkum. Flokkunarreglur kerfisins geta orðið æði flóknar, t.d. geta margar aukaverkanir/fylgikvillar einungis haft áhrif með sumum aðalsjúkdómsgreiningum en öðrum ekki. Samræming og nákvæmni í skráningu sjúkdóma og aðgerða á heilbrigðisstofnunum er því lykilatriði.
Þjónustuaðili
Embætti landlæknis