Húsnæðisbætur

Forsendubreytingar

Ef forsendur útreikninga á húsnæðisbótum breytast getur upphæðin breyst. Þá er best biðja um endurútreikning svo að þú lendir ekki í að þurfa að greiða til baka ofgreiddar bætur.

Dæmi um forsendubreytingar:

• Heimilisfólki fjölgar eða fækkar.

  Hægt er að breyta heimilisfólki inni á Mínum síðum HMS.

• Barn verður 18 ára.

  Barnið þarf að skrá sig inn á Mínar síður HMS og gefa sitt samþykki.

• Tekjur eða eignir breytast.

  Endurreikna þarf upphæð bóta.

• Leigutíma lýkur.

  Þarf að láta HMS vita um endurnýjun samnings, nýja íbúð eða uppsögn á umsókn.

Lokauppgjör

Á hverju ári er reiknað lokauppgjör húsnæðisbóta fyrir árið á undan. Uppgjörið er reiknað þegar staðfest skattframtal liggur fyrir. Oftast næst það um mánaðamót maí-júní.

Ef tekjur og eignir hafa breyst getur verið að þú eigir inni bætur eða þurfir að greiða til baka.

Inneign

Inneignir eru greiddar inn á þinn persónulega bankareikning sem er skráður í umsókninni um bætur.

Skuld

Ef þú ert enn að fá húsnæðisbætur dragast ofgreiddar bætur sjálfkrafa frá næstkomandi bótum. Aldrei er dregið frá meira en 25% af bótum í hverjum mánuði. Þú getur líka óskað eftir að fá innheimtukröfu og borga alla skuldina strax.

Ef þú færð ekki lengur húsnæðisbætur geturðu óskað eftir greiðsludreifingu á allt að 12 mánuði. Hver greiðsla þarf að vera 10.000 krónur eða hærri.